Jalalaqsi (Bulacle.com) – Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, iyo wafdi uu hoggaaminayo ayaa maanta booqasho ku tagay degmada Jalalaqsi ee gobolka Hiiraan. Wafdiga waxaa ka mid ahaa agaasimaha waaxda caafimaadka hay’adda, Dr. Cabdullaahi Muuse Axmed, dhaqaatiir ka tirsan SoDMA iyo Isbitaalka Madiina.
Safarkan ayaa la xiriira xoojinta dadaallada gargaarka banii’aadannimo iyo qiimeynta xaaladda nololeed ee dadka ku nool Jalalaqsi iyo deegaannada ku xeeran. Guddoomiyaha ayaa gacan ka geystay gargaarka dadka nugul, isagoo daawo iyo raashin ku wareejiyay hoggaanka wasaaradda gargaarka iyo maareynta musiibooyinka Hirshabeelle iyo maamulka degmada.
Wafdiga guddoomiyaha waxaa garoonka diyaaradaha Jalalaqsi kusoo dhoweeyay Xildhibaan Maalik Cabdalla oo ka tirsan Golaha Shacabka, agaasimaha guud ee wasaaradda gargaarka Hirshabeelle Cabdifataax Maxamed Yuusuf, guddoomiyaha degmada Jalalaqsi Nuur Maxamed Absuge (Nuur Dheere) iyo masuuliyiin kale.
Booqashadan ayaa qeyb ka ah dadaallada dowladdu ku doonayso in ay ku xoojiso gurmadka loo fidinayo dadka ay saameeyeen xaaladaha banii’aadannimo ee dalka.
Bulacle.com
0 Comments