Fariin Adag! Wasiirka Waxbarashada Galmudug oo Ka Hadlay Foowdada, Amniga & Eedeynta Taliyihii Hore ee NISA"

Dhuusamareeb (bulacle.com)-Wasiirka Waxbarashada Dawladda Galmudug, Maxamed Xaashi Dhoore, ayaa maanta ka digay foowdo iyo carqaladeyn ku saabsan amniga gobolka, isagoo dusha ka saaray eedaha lagu soo rogay Taliyihii hore ee Hay’adda NISA, Mahad Salad. Wasiirku waxaa uu sheegay in Mahad Salad uu yimid magaalada Dhuusamareeb isagoo hordhac u ahaa Madaxweynaha Qaranka, balse uusan si fiican ugu dhaqangelin hawlihii loo igmaday. 

 Wasiir Dhoore ayaa si cad uga hadlay sida Mahad Salad uu u inkiray raggii beel ahaan u metelayay Galmudug, isagoo tilmaamay in uusan dareemin in wadashaqeyn iyo tashi ay tahay habka loogu dagaal galo argagixisada. “Markii aan aragnay habdhaqankiisa iyo inuusanba dareensanayn in wadashaqeyn iyo tashi dhexdeena ah lagu galo dagaalkii cadawga, waxaa nala timid inaan ka gaabsanno eedaha naga soo horjeeday,” ayuu yiri Wasiir Dhoore. 

 Taliyaha NISA Oo Loo Eedeeyay Inuu Xadgudub Sameeyay

 Wasiirka ayaa sidoo kale sheegay in Taliyihii hore ee NISA uu jeebka ku watay saanadaha iyo agabka ciidamada beesha Cayr, kuwaas oo loogu talagalay inay ka qeyb qaataan dagaalka argagixisada. “Nasiib darro, markii aan aragnay in kuwii Taliyuhu jeebka ku watay ay xitaa naf ka raadinayaan saanaddii iyo agabkii ciidankii beesha, waxaan gabi ahaanba ka gaabsannay inaan ku millanno oo aan wax ka walaaqno waxa ay sameynayaan,” ayuu yiri Wasiir Dhoore. 

 Wuxuu intaasi ku daray in meelaha qaar ay joogeen rag dagaal oo daacad ah, inkastoo ay gadaal ka heysteen kuwii saanadaha iyo sahayda nafta ka raadinayay. “Fashilkii markuu arkay, Taliyuhu wuxuu maalin cad nagu sheegay inuu qaldamay oo uu hadda kaddib uu masuuliyiinta Galmudug beesha Cayr kasoo jeedin doono dagaalka iyo abaabulka,” ayuu yiri Wasiir Dhoore. 

 Shir Loo Ixtiraamo Beesha Cayr Iyo Dhaqangelinta Hawlaha Amniga 

 Wasiir Dhoore ayaa sheegay in dawladda Galmudug ay codsatay in shir lagu qabto dhammaan masuuliyiinta heer Federaal, dowlad goboleed, degmo iyo qeybaha bulshada, sida dhaqanka, ganacsatada, haweenka, culumada, iyo dhallinyarada. Si kastaba ha ahaatee, Taliyaha NISA wuxuu diiday oo dafiray guddigii laga soo saaray, kaasoo ka koobnaa 3 wasiir oo ka tirsan dawladda Galmudug, wasiiru dowlaha biyaha iyo tamarta Federaalka, 3 xildhibaan, iyo guddoomiyayaal degmooyinka Matabaan, Guriceel, iyo Dhuusamareeb. 

 “Guddigaasi wuxuu ka shaqeyn waayay taliyaha, oo raggii uu markii horeba jeebka ku watay ayuu markale ka dhigtay wakiilo idman oo waxa ay rabaan sameeya,” ayuu yiri Wasiir Dhoore. 

Fashilkii Dagaalka Ceeldheere Iyo Saamayntiisa

 Wasiirka ayaa sheegay in fashilkii dagaalka Ceeldheere uu sabab u yahay sidii loo abaabulay dagaalka, iyadoo qof waliba bustihiisa gacanta ku qaatay. “Tubtaasi waxay daliil cad u ahayd fashilkii lagala kulmay abaabulkii beesha Cayr,” ayuu yiri. 

 Wuxuu sidoo kale xusay in unuggii ugu hooseeyay ee uu Taliyuhu kasoo jeeday, oo ah reer Gaban, ay ka soo baxeen dagaalkii Ceeldheere iyagoo tabasho ka qaba, taas oo keentay in dagaalku uu ku qancin waayay. 

 Hadal Culus Oo Loo Jeediyay Taliyaha NISA

 Wasiir Dhoore ayaa ugu baaqay Taliyaha NISA inuu iska ilaaliyo habdhaqanka kibirka iyo isla weynida. “Hadda mar kale ayuu jidkii qaldanaa hayaa, isla raggii shalay ayuu soo diray isagoon waxba nagala tashan oo aan nagu ixtiraamin beesha aan ku meteleyno Galmudug,” ayuu yiri. 

 Wuxuu intaasi ku daray in Taliyuhu uu u dirayay wiilal uu leeyahay dagaal loo wedayay Shabeelaha Dhexe, isagoo sheegay in aanay sidaas u dhammaan doonin haba yaraatee. “Kuwii aad shalay kibirka iyo isla weynida nagu dhaaftay adigoo xil iyo xoolo haya ayey sidoo kale fashil kaaga soo dhammaan doontaa,” ayuu yiri Wasiir Dhoore. 

 Dowladda Galmudug Oo Diyaar U Tahay Inay Garab Istaagto Madaxweynaha Qaranka

 Wasiirka ayaa ku dheeraaday in dawladda Galmudug ay diyaar u tahay inay garab istaagto Madaxweynaha Qaranka, Mudane Xasan Sheekh Maxamuud, si loo xoojiyo dagaalka argagixisada. Si kastaba ha ahaatee, wuxuu carabka ka joojiyay in rag dan gaar ah leh ay maleeyshiyaad ka dhex qoraan oo aanay cidna yeelin. 

 

“Galmudug maamul jira waaye in rag dan gaar ah leh ay maleeyshiyaad ka dhex qoraan cidna yeeli meyso,” ayuu ku dhammeeyay hadalkiisa Wasiir Dhoore. 

Ku soo dhawoow Bulacle.com, halkaad ka heli doonto wararka ugu danbeeyay ee Soomaaliya iyo caalamka.