DF oo Soo Saartay Digniin Culus Oo Ku Socota Laba Dhinac

 

Xamar (bulacle.com) – Dowladda Federaalka Soomaaliya ayaa maanta soo saartay digniin culus oo ku saabsan dagaalka ka socda laba dhinac ee lagula jiro kooxda argagixisada Al-Shabaab. Digniintan ayaa waxaa jeediyay Wasiirka Gaashaandhigga Soomaaliya, Mudane Cabduqaadir Maxamed Nuur (Jaamac), oo u digay dadweynaha inay ka fogaadaan meelaha ay ku sugan yihiin maleeshiyaadka Al-Shabaab. 

 

Wasiir Jaamac ayaa shaaciyay in dowladdu ay dhowr jeer u dirtay digniinno shacabka oo loogu tala galay inay ka fogaadaan la macaamulka kooxaha Khawaarijta iyo meelaha ay ku sugan yihiin. Si kastaba ha ahaatee, wuxuu tilmaamay in ay jiraan goobo ay weli ku nool yihiin dad shacab ah oo ku nool deegaanno ay ka taliso Al-Shabaab. 

 

Wasiirka ayaa si gaar ah u xusay deegaanka Ceel Bacad ee gobolka Shabeelaha Dhexe, halkaas oo lagu arkay dad badan oo si toos ah ula macaamilaya kooxaha Khawaarijta. Wuxuu kaloo u digay inay jiraan goobo ay haatan ku dhuumaaleysan yihiin xubnaha Al-Shabaab, isagoo ugu baaqay shacabka inay ka fogaadaan meelahaas si looga hortago waxyeelooyinka kasoo gaari kara weerarada iyo duqeymaha ay sameeyaan kooxaha argagixisada. 

 

“Anagoo aad uga fogaaneyna in shacab waxyeelo ka soo gaarto duqeynta ayaa waxaan amiiro ka tirsan Khawaarijta ku duqeyney deegaanka Ceel Bacad. Waxaan mar labaad shacabka uga digeynaa in eysan Khawaarijta la macaamilin, ayna ka fogaadaan meelaha ay joogaan,” ayuu yiri Wasiir Cabduqaadir Maxamed Nuur (Jaamac). 

 

Howlgallo Culus Oo Ka Socda Shabeelaha Dhexe

 

Hadalkan ayaa ku soo beegmay xilli ay ka socdaan howlgallo culus oo ay wadaan ciidamada dowladda iyo saaxibada caalamiga ah, kuwaas oo lagula jiro Al-Shabaab oo soo galay deegaanno ka tirsan gobolka Shabeelaha Dhexe. Howlgalladan ayaa waxaa ku dhex jira duqeymo culus oo ay ku dileen horjoogayaal iyo maleeshiyaad tiro badan oo ka tirsanaa kooxda argagixisada. 

 

Dagaallada socda ayaa waxaa ka qeyb qaata dowladda Federaalka Soomaaliya, dadka deegaanka, iyo saaxibada caalamiga ah, si loo jabiyo xoogaga Al-Shabaab. Ugu dambeyntii, waxaa lagu dilay horjooge Yuusuf Dhegnaas iyo in ka badan 20 maleeshiyaad oo ka tirsanaa kooxda Khawaarijta, kuwaas oo duqeyn lagu khaarijiyay deegaanno ka tirsan gobolka Shabeelaha Dhexe. 

 

Sida uu Wasiirka Gaashaandhigga sheegay, dowladdu waxay sii wadi doontaa howlgallada lagula jiro Al-Shabaab si loo xaqiijiyo amniga shacabka iyo nabadgelyada guud ee dalka. 

 

Ku soo dhawoow Bulacle.com, halkaad ka heli doonto wararka ugu danbeeyay ee Soomaaliya iyo caalamka