Minneapolis (bulacle.com) – Warbixin cusub oo la shaaciyey Talaadadii ayaa daaha ka rogtay xog cusub oo la xiriirta kiiska Ladan Mohamed Ali, haweeney Soomaali ah oo horey loogu eedeeyay inay isku dayday inay laaluush siiso xeerbeegti maxkamadeed iyadoo sidatay boorso ay ku jiraan $120,000 oo lacag caddaan ah.
Dukumeenti maxkamadeed ayaa muujinaya in Ladan Mohamed
Ali, oo 31 jir ah una dhalatay Seattle, ay gacanta ku haysay shirkad
cunto-sameeye oo la yiraahdo Afro Produce, taasoo sannadkii 2018 laga
diiwaangeliyay magaalada St. Paul ee gobolka Minnesota. Waxaa la sheegay in
shirkaddan ay xiriir la lahayd hay’ado kale oo ku lug yeeshay khiyaanadii lagu
lunsaday malaayiin dollar oo ka timid barnaamijka nafaqaynta carruurta ee
dowladda federaalka Mareykanka.
Intii u dhexeysay 2020 iyo 2021, shirkadda Afro
Produce ayaa la xusay inay cunto keentay shirkado ay gacanta ku hayaan dad
horay u qirtay dambiyo la xiriira kiiska Feeding Our Future, oo ahaa mid ka mid
ah fadeexadihii ugu waaweynaa ee lagu xaday lacagaha deeqaha la bixiyay
xilligii COVID-19.
Maxkamadda ayaa sidoo kale dhageysatay marag-fur ka
yimid Pauline Roase, oo ah xisaabiye ka tirsan FBI, taasoo sheegtay in
baaritaankeeda uu muujiyay in xisaabaadka bangiga ee shirkadda Afro Produce
aysan caddeyn karin in wax cunto ah dhab ahaantii la iibiyay, taas
beddelkeedana, shirkaddu ay gudbisay qaansheegad been abuur ah oo
muujinaysa iibsasho aan dhicin.
Sida lagu sheegay warqad baaritaan oo uu qoray
sarkaalka FBI Kevin Kane, tuhmanayaashu waxay Afro Produce u adeegsadeen
sidii ay raadkooda u qarin lahaayeen, iyagoo isticmaalay fursadaha maaliyadeed
ee la bixiyay si loo caawiyo barnaamijyada nafaqada ee carruurta, balse ay u
leexsadeen si khaldan.
Waxaa qoray: Mohamud Cabdlle
➡️ bulacle.com
0 Comments