Awdheegle (Bulacle.com) – Xoogaga Al-Shabaab ayaa saaka weerar culus ku qaaday degmada Awdheegle ee gobolka Shabeellaha Hoose, kaas oo ku billowday qaraxyo waaweyn oo lala beegsaday saldhig ay ciidamada dowladda ku leeyihiin halkaas, waxaana xigay dagaal toos ah oo dhexmaray labada dhinac.
Sida ay sheegeen ilo deegaanka ah, weerarkan waxa uu sababay khasaare isugu jira dhimasho iyo dhaawac, inkasta oo aan weli si rasmi ah loo xaqiijin karin tirada rasmiga ah ee waxyeelladu gaartay.
Qoraal kasoo baxay dowladda federaalka Soomaaliya ayaa lagu sheegay in ciidamadu ay si geesinimo leh isaga difaaceen weerarka uga yimid Al-Shabaab, isla markaana ay kooxdii weerarka soo qaaday gaarsiiyeen jab culus.
“Ciidanka Xoogga Dalka Soomaaliyeed ayaa si feejigan u ogaaday dhagarta cadowga, iyagoo halkaasi ku gaarsiiyay jab culus, islamarkaana baacsanaya firxadka naf-la-caariga ah ee ka haray weerarka,” ayaa lagu yiri qoraalka kasoo baxay dowladda.
Xaaladda Awdheegle ayaa weli kacsan, waxaana aagga laga dareemayaa dhaq-dhaqaaqyo ciidan, iyadoo howlgallo culus ay ka wadaan ciidamada dowladda si ay uga hortagaan khataraha kale ee ka imaan kara kooxaha argagixisada.
Weerarkan ayaa kusoo aadaya iyadoo dhowaan ay Al-Shabaab weerar la mid ah ku qaaday magaalada Beledweyne, halkaas oo ay ku beegsadeen hoteel ay deganaayeen odayaal dhaqameed iyo saraakiil ciidan.
Labada Shabeelle ayaa xilligan wajahaya xaalado dagaal oo culus, iyadoo ciidamada dowladda iyo kuwa deegaanka ay wadaan guluf ballaaran oo ka dhan ah Al-Shabaab si looga saaro deegaannada ay weli kaga sugan yihiin gobolka.
Bulacle.com
0 Comments