Shacabka Soomaaliyeed oo Dowlada ka dalbaday in dib loo soo celiyo Lacagtii Shilin soomaaliga!

Muqdisho (bulacle.com)– Inta badan shacabka Soomaaliyeed ayaa si buuxda ugu baaqay dowladda soomaaliyeed inay dib u soo celiso isticmaalka lacagaha  Shillin Soomaaliga, maadaama ay xilligaan inta badan lagu  tiirsan yihiin lacagaha qalaad, gaar ahaan Doolarka Mareykanka.

 

Isticmaalka Shillin Soomaaliga ayaa si weyn hoos ugu dhacay sannadihii la soo dhaafay, iyadoo gebi ahaan Gayiga Soomaalida ay ka maqan tahay lacagta Shilli soomaaliga , marka laga reebo qaybo ka mid ah Muqdisho, oo ah caasimadda dalka.

 Horumar la'aanta dhaqaalaha iyo sicir-bararka ka dhashay isticmaalka lacagaha qalaad ayaa keenay in dadka Soomaaliyeed, oo intooda badan isticmaali jiray ShillinSoomaali, ay hadda la kulmaan caqabado adag oo ku aaddan helitaanka iyo maareynta noloshooda.

 

Shacabka ayaa muujinaya in sicir-barar baahsan uu ku yimid qiimaha macaashka, iyadoo sidoo kale ay ka cabanayaan in dadka danyarta ah aanay awoodin inay iibsadaan cunto ku filan, taas oo ka dhigan in ay la kulmaan dhibaatooyin nololeed.

 

Gobollo qaar ee dalka, sida Puntland iyo Somaliland, waxay isticmaalaan lacagahooda gaar ah, taasoo sii xoojineysa kala qeybsanaanta dhaqaalaha iyo suuqyada. Arrintan ayaa sabab u ah in shacabka Soomaaliyeed ay baaqyo badan u jeediyaan dowladda, iyadoo ay ugu weyn tahay in la abuuro nidaam ku salaysan isticmaalka Shillin Soomaaliga si loo horseedo isbeddel dhaqaale oo waara.

Qaar ka mid ah dadka la hadlay bulacle.com waxay muujinayaan in haddii dowladda aanay wax ka qaban arintan, ay suurtagal tahay in saboolnimo cusub ay ka dhalato gayiga soomaaliyeed, Su'aasha la isweydiinayo ayaa ah, maxaa hortaagan in dalka lagu soo celiyo lacagta Shillin Soomaaliga? Shacabka ayaa sugaya jawaab waafi ah oo ka timaadda dowladda.

Sidoo kale Waxaa muhiim ah in lagu xuso in arrintan ay saameyn xun ku yeelan karto bulshooyinka danyarta ah, taasoo khatar gelin karta noloshooda iyo mustaqbalkooda.

Ugu dambeyntii, shacabka ayaa si weyn u sugaya talaabooyin wax ku ool ah oo looga hortagi karo mushaar-yarada iyo dhibaatooyinka dhaqaale.Shacabka soomaaliyeed ayaa intooda badan waxa ay naawilayaa in ay helaan lacagta shhilinka soomaaliga madaama ay itabadan isticmaalaan Lacago qalaad gaar ahaan Doolarka Mareykan.