Ra’iisul Wasaaraha Xamse oo Hanjabaad u Diray Masuuliyiinta ku Xadgudba Xaquuqda Haweenka soomaaliyeed!

Muqdisho (bulacle.com)– 𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐗𝐚𝐦𝐬𝐚 𝐨𝐨 𝐛𝐚𝐥𝐥𝐚𝐧-𝐪𝐚𝐚𝐝𝐚𝐲 𝐢𝐧 𝐗𝐮𝐤𝐮𝐮𝐦𝐚𝐝𝐝𝐢𝐢𝐬𝐮 𝐭𝐚𝐥𝐥𝐚𝐚𝐛𝐨 𝐤𝐚 𝐪𝐚𝐚𝐝𝐢 𝐝𝐨𝐨𝐧𝐭𝐨 𝐦𝐚𝐬𝐮𝐮𝐥 𝐰𝐚𝐥𝐛𝐚 𝐨𝐨 𝐤𝐮 𝐱𝐚𝐝-𝐠𝐮𝐝𝐛𝐚 𝐗𝐮𝐪𝐮𝐮𝐪𝐝𝐚 𝐇𝐚𝐰𝐞𝐞𝐧𝐤𝐚.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa sheegay in haweenka Soomaaliyeed ay door muuqda ku leeyihiin Xukuumadda DanQaran, ayna dhawaan heli doonaan xuquuqda ay ku leeyihiin Agaasimeyaasha Guud ee Wasaaradaha iyo hey’adaha kala duwan ee dowladda.

 

Mudane Xamsa ayaa hoosta ka xarriiqay in aan la aqbali doonin xadgudub kasta oo lagu sameeyo xuquuqda haweenka, isagoo sheegay in xukuumaddu ay ansixisay sharciyadii lagu ilaalinayey xuquuqda haweenka Soomaaliyeed.

 

Ra’iisul Wasaaraha ayaa tilmaamay in haweenku ay door muhiim ah ka ciyaarayaan dowlad-dhiska iyo tayeynta hey’addaha Qaranka. Wuxuu ugu baaqay haweenka inay u diyaar garoobaan doorashooyinka qof iyo codka ah ee dalka laga qabanayo, si ay u doortaan dumarkooda aqoonta leh ee wax u taraya dalka.

 

“Haweenku waa laf-dhabarta Qarankeennu ku tiirsanaa waqtigii adag ee la soo maray, sidaas awgeed, waxaan doonaya in aan u mahadceliyo, kuna dhiirrigeliyo dhamaadka dedaalka naf-hurnimada ah iyo shaqada culus ee ay dalkooda u hayaan,” ayuu yiri Ra’iisul Wasaaraha.

 

Ra’iisul Wasaaraha ayaa sidoo kale ku bogaadiyey shirkadaha gaarka loo leeyahay in ay fursad siiyaan haweenka aqoonta leh, si kor loogu qaado shaqo abuurka iyo awood-siinta dumarka.