WASIIRKA GAADIIDKA DFS: Garoonka Dhuusamareeb Waxaan U Qalabeyneynaa Qaab Casri Ah.

Dhuusmareeb (bulacle.com)-Madaxwayne ku-xigeenka Dowladda Galmudug, Mudane Cali Daahir Ciid, iyo Wasiirka Wasaaradda Gaadiidka iyo Duulista Hawada DFS, Marwo Fardowso Cismaan Cigaal, ayaa kormeer ku sameeyay dhismaha Garoonka Diyaaradaha ee magaalada Dhuusamareeb, caasimadda dowlad goboleedka Galmudug, Kormeerkan ayaa lagu soo bandhigay heerka shaqo ee garoonka iyo horumarka ka socda dhismaha garoonka.

Wasiiradda Gaadiidka iyo Duulista Hawada DFS ayaa hogaaminaysay wafdi ay kamid yihiin Maareeyaha Guud ee Hay’adda Duulista Rayidka, Ahmed Macalin, iyo masuuliyiin kale, Waxaana Wafdigaan waxaa Dhuusamareeb ku soo dhoweeyay madaxweyne kuxigeenka oo ay wehliyaan wasiiro, xildhibaano, iyo maamulka Galmudug.

Wasiiradda iyo Maareeyaha Hay’adda Duulista Rayidka ah ayaa caddeeyay in ay jiraan horumarro muuqda oo ka socda Galmudug iyo dhismaha Garoonka Dhuusamareeb iyadoona ballanqaaday in garoonka diyaaradaha Dhuusamareeb uu noqon doono garoon caalami ah, iyadoo dowladda Soomaaliya ay ka taageeri doonto qalabeynta garoonka, iyadoo loogu talagalay $2 milyan oo doolar si loo hubiyo in garoonka uu la jaanqaado garoomada caalamiga ah.

Madaxweyne kuxigeenka Galmudug, Cali Daahir Ciid, ayaa ka mahadceliyay wasiiradda booqashada ay ku tageen Galmudug iyo sida wanaagsan ee ay ula shaqeynayaan Wasaaradda Gaadiidka Galmudug, Wuxuna adkeeyay in loo baahan yahay garab istaag iyo in dowladdu gacan ka gaysato horumarinta garoomada dowladda Galmudug.

Ugu dambeyntii, kormeerka waxaa lagu soo gaba-gabeeyay xarunta shirkadda dhismaha garoonka ee Olonbic, iyaga oo ku guuleystay horumarin wanaagsan oo ka socda garoonka diyaaradaha Dhuusamareeb. Waxaana la sheegay in dhismaha garoonka si buuxda looga dhammeyn doono waqtiga uu Madaxweynaha Galmudug, Axmed Cabdi Kaariye, horay u balan qaaday.