Wararkii ugu danbeeyay dagaalo lagu hoobtay oo ka dhacay beriga GALGADUUD.

Dhuusmareeb( bulacle.com)-  Warar kala duwan ayaa ka soo baxaya khasaaraha ka dhashay dagaal aad u culus oo saakay ka dhacay deegaano hoostaga magaalada Dhuusamareeb caasimada dowlada Galmudug.

Inta la xaqiijiyay waxaa dagaalka ku dhintay 11 ruux oo iskugu jira maleeshiyaadkii saakay dirirtu dhexmartay deegaanka bali-caano oo u dhexeeya magaalooyinka Ceel-garas iyo Dhuusamareeb, Wararka ayaa intaasi kusii daraya in maleeshiyaadka dagaalamay saakay ay horay iskaga dileen dad farabadan oo u dhintay siyaabo kala duwan una badan aanooyin qabiil

Xaaladda ayaa haatan ah mid kacsan, waxaana dhinacyada dagaalamaya ay helayaan gurmadyo, taas oo uga sii dareysa xiisadda ka taagan halkaasi.

Dadka deegaanka ayaa ku soo waramaya  in ay  adagtahay in dadkaas kala dhexgalo madaama ay Alshabaab halkaas ka ag dhawyihiin lagana yaabo in ayba ku lug leeyihiin colaada ka taagan deegaanka.

Wali Ma jiro wax hadal ah oo kasoo baxay maamulka  Galmudug, balse waxaa lagu soo warramayaa in ciidamo ka tirsan maamulka ay ku baxeen dagaalkaasi, si loo qaboojiyo xiisada kataagan halakaasi.

Colaadaan u dhexeysa labadaan beelood ayaa ah mid soo jiitameysay sanadadii la soo dhaafay mana muuqato wadadii ay ku joogsan lahayd madaama ay adagtahay in deegaankaas ay gaaraan dadka indheer garadkaa ee ka soo jeeda deegaanada lagu dagaalamayo .

Gobollada dhexe ayaa waxaa marar badan kusoo laa laabtay colaad beeleedyo saameyn ku yeeshay dadka shacabka ah ee ku dhaqan deegaannada hoostaga gobolladaasi.