Warar Cusub: Shariif Sheekh Axmed Oo Ku Bogaadiyay Doorashada Madaxweyne Axmed Madoobe Ee Kismaayo.

Kismaayo (bulacle.com) – Madaxweynihii hore ee Soomaaliya, Shariif Sheekh Axmed, ayaa si weyn u bogaadiyay dib u doorashada Madaxweynaha Jubbaland, Axmed Madoobe, oo maanta ka dhacday magaalada Kismaayo. Munaasabadda doorashadan ayaa dhacday iyadoo uu  jiray khilaaf xooggan oo u dhexeeya maamulka Jubbaland iyo dowladda dhexe.

 

Shariif Sheekh Axmed wuxuu doorashada ku tilmaamay mid muhiim ah oo meesha ka saartay muddo kordhinta sharci darrada ah ee dowladda federaalka ku cadaadinaysay dowlad goboleedyada.“Waxaan halkaan u hambalyeynayaa Ahmed Maxamed Islaam (Axmed Madoobe) oo maanta loo doortay in uu hoggaamiyo Jubbaland shanta sano ee soo socota," ayuu ku yiri Shariif qoraalkiisa uu soo galiayay bartiisa facebook.

 

Wuxuu sidoo kale ka digay in ciidamada qaranka loo isticmaalo danaha siyaasadeed, isaga oo ku baaqay in laga fogaado abuurista xasarad cusub iyo qalqal-galinta deegaannada Jubaland.

 

Axmed Madoobe, oo noqonaya madaxweynaha Jubbaland markii saddexaad, ayaa ku helay doorashada 55 cod, isagoo ka soo baxay wareegga koowaad ee doorashada.

 

Shariif Sheekh Axmed ayaa madaxweynahaan cusub ku dhiirrigeliyay in uu kaalmo weyn ka geysto xallinta arrimaha siyaasadeed ee dalka ka taagan, si loo xaqiijiyo nabad iyo wadajir.

 

Doorashadan ayaa qeyb ka ah isbeddelada siyaasadeed ee ka socda Soomaaliya, iyadoo la filayo in saameyn ballaaran ay ku yeelato siyaasadda gobolka.

Sidoo kale siyaasiyiin badan ayaa soo dhaweeyay doorashada axmed Madoobe ee Maanta ka dhacday kismaanyo.

Maxay kulatahay adiga?