Hormuud Telecom oo Kasbatay Abaalmarin Caalami ah iyo Madaxweyne Qoor Qoor oo Ku Bogaadiyay.

 

Dhuusamareeb (bulacle.com) - Madaxweyne Ahmed Abd Kariye Qoor Qoor ayaa si xooggan u hambalyeeyay Hormuud Telecom, isagoo ku bogadiyay guushooda weyn ee ay ka gaareen abaalmarinta **Connecting the Unconnected Award** oo lagu qabanayay madasha Glotel Awards ee dalka Ingiriiska.

 

“Guusha Hormuud Telecom waa mid ah lagu farxo, waana guul qaran oo ay ka faa'iideysanayaan dhammaan shacabka Soomaaliyeed,” ayuu yiri Madaxweyne Qoor Qoor. "Hormuud waxay muujisay dadaal iyo hogaamin heer caalami ah, taas oo ka tarjumeysa sida ay shirkaddu ugu heellan tahay horumarinta isgaarsiinta Soomaaliya iyo kobcinta dhaqaalaha dalka."

 

Madaxweyne Qoor Qoor ayaa xusay in guushan ay ka tarjumeyso horumarka iyo wanaagga oo Hormuud u soo hoyay qaranka Soomaaliyeed, isagoo u mahadceliyay madaxda shirkadda iyo shaqaalaha ku hawlan horumarinta adeegyada isgaarsiinta. “Dhammaan Madaxda aad iyo aad ayaad ugu mahadsan tihiin, waxaana idinka rajeynayaa in aad sii wadaan shaqooyinka mudan taageerada shacabka Soomaaliyeed,” ayuu raaciyay.

 

Guusha Hormuud Telecom ayaa si weyn loo soo dhaweeyay, iyadoo qof kastaa uu muujinayo farxadda iyo taageerada ay u hayaan shirkadda. Tani waxay sidoo kale cadeyn u tahay kartida Soomaaliya ee ay ka gaareyso meel sare oo isgaarsiin ah, taas oo muhiim u ah kala xiriirka bulshada iyo horumarinta dhaqaalaha.

 

Madaxweyne Qoor Qoor, oo ka mid ah hoggaamiyeyaasha ugu caansan Soomaaliya, ayaa mar kale muujiyay waxa uu ka dhigan yahay in la is taageero, lana horumariyo dalka,Hambalyo Hormuud Telecom iyo dhammaan shacabka Soomaaliyeed!