HESHIISKA ITOOBIYA IYO SOMALILAND: Aragtida Madaxweyne Cabdiraxmaan Cirro iyo Mustaqbalka Aqoonsiga.

 

Hargeysa (bulacle.com) – Cabdiraxmaan Maxamed Cabdillaahi (Cirro) ayaa ku guuleystay doorashadii madaxweynaha maamulka Somaliland, isagoo ka adkaaday madaxweyne Muuse Biixi Cabdi. Guushaasi ayaa timid iyadoo x ku dhisan ololaha doorashada ee uu qaaday Cirro, kaas oo ka mid ahaa qoddobada waaweyn ee laga hadlayay heshiiskii is-afgaradka ahaa ee Itoobiya iyo Somaliland, kaas oo la saxeexay bishii December ee sanadkii hore.

 

Heshiiskan ayaa u ogolaanaya Itoobiya inay ka kireysato xeeb dhererkeedu yahay 20 KM oo ka tirsan Somaliland si ay u isticmaasho marin badeed iyo ganacsi. Sida ay sheegeen masuuliyiinta Hargeysa, Itoobiya ayaa sidoo kale ogolaatay inay aqoonsato Somaliland. Sidoo kale, waxay ku dhawaaqday inay Somaliland qeyb ka siinayso saami qaybsiga shirkadda diyaaradda Itoobiya, taas oo muujineysa in dawladda Itoobiya ay qorshaynayso inay qaadato mawqif firfircoon oo ku saabsan aqoonsiga Somaliland.

 

Inkastoo heshiiskan is-afgaradka ah loo bedeli doono heshiis wax ku ool ah muddo bil gudaheed ah, wali ma jiro wax isbadal la taaban karo oo ka dhacay tan iyo markii lagu dhawaaqay heshiiska, taas oo sii xumeeyay xiriirka u dhexeeya Itoobiya iyo Soomaaliya, maadaama Somaliland ay u aragto inay qayb ka tahay dhulkeeda.

 

Cabdiraxmaan Cirro, oo ah madaxweynaha la doortay, xilligii ololaha doorashada wuxuu sheegay in xisbigiisa uu dib u eegis ku sameyn doono heshiiska. Inkastoo uusan si toos ah u diidin heshiiskan, hadana wuxuu adeegsadaa erayo diblomaasiyadeed markii uu ka hadlayo arrintan.

 

Afhayeenka xisbiga Waddani, Maxamuud Aadam, oo lagu weydiiyay sida ay u arkaan heshiiska, ayaa xusay inay ka turneen mawqifkooda kahor doorashada, wuxuuna caddeeyay in aragtidooda aysan isbedel ku imaan doonin. Wuxuu kaloo sheegay in heshiiska aan loo soo bandhigin xisbiga intii hawsha lagu guda jiray, taasoo ka dhigaysa mid aan la falanqeyn karan waqtigan.

 

Maxamuud ayaa intaa ku daray inay ogyihiin in aysan jirin wax wada hadal ah oo dhax maray dowladda Somaliland iyo Itoobiya. Sidoo kale, wuxuu sheegay in xisbiga Waddani uu diiradda saari doono dadaallada lagu raadinayo aqoonsi caalami ah, wuxuuna rajeynayaa in madaxweynaha la doortay iyo xukuumaddiisa ay ku dadaali doonaan sidii riyadaas loo hirgelin lahaa.

 

Madaxweynaha la doortay Cabdiraxmaan Cirro ayaa la filayaa inuu xafiiska la wareego bartamaha bisha December, waxaana la sugayaa in isbadallo laga dareemo siyaasadda dhex marta Somaliland iyo Itoobiya. Aragtida C/raxmaan Cirro ee ku aadan heshiiska ayaa muujineysa in arrintani ay sii jiri doonto lana socon doonto si xamaasad leh, iyadoo la filayo in qof kasta oo mas'uul ka ah isbeddelka cusub uu ka fiirsado mustaqbalka Somaliland.